HALOT RESTUS MORTAIS 259 IHA MUNISÍPIU LIQUIÇA

Dep. Media 14 June, 2017 

Prezidente Repúblika, Francisco Guterres “Lu Olo” hamutuk ho Primeiru Ministru, Rui Maria de Araújo, partisipa seremónia halot restus mortais hamutuk 259, iha Jardim Herois Munisípiu Liquiça. Antes halot restus mortais ba dahuluk halo missa ne’ebé prejidi hosi Amo Bispo Dioseze Maliana, Dom Norberto do Amaral. Seremónia refere organiza hosi Ministériu Solidariedade Sosiál-MSS no Komisaun Rekolla Restus Mortais, ne’ebé hala’o iha Munisípiu Liquiça, loron Kuarta-Feira (14/06/2017).

Iha diskursu, Prezidente Francisco Guterres “Lu Olo” hateten, serimónia ida ne’e atu fó onra no dignifika herois mártires hamutuk 259, no hanoin fila fali períodu istória ida ne’ebé reprezenta mehi no vontade koletivu ida ne’ebé halo ho kbi’it no matenek rasik. Istória ida ne’ebé halo ho barani ho determinasaun, nomós ho sakrifisiu oi-oin i iha tinan 24 nia laran ema rihun ba rihun mak lakon sira nia vida iha funu laran, rihun ba rihun mak dadur no simu sakrifisiu oi-oin hodi realiza mehi boot ida ukun rasik-an.

Herois ne’ebé ohin atu hakoi iha rai lulik ida ne’e, fó nia-an tomak, fakar sira nia ran ba rai ida ne’e, martires sira ne’ebé hala’o kna’ar iha Frente Dimplomátiku, Armada no Klandestina.

“Liu hosi sira nia sakrifisiu no mate mak ita restaura fila fali ita nia independénsia, ho sakrifisiu sira nian mak ita bele sai nasaun ida no ita bele hamriik ohin loron nu’udar povu ida ho ninia história rasik, kultura rasik, neon rasik no hakarak rasik,” dehan Prezidente RDTL Lu-Olo..

Prezidente mós husu, atu Komisaun Omenajen no Komisaun Rekollha Restu Mortais atu bele haree dadus mártires sira nian hotu hodi tau iha sisteme dijitalisasaun, atu nune’e vizitante sira mai bele haree no hatene tuir mártires sira ne’ebé mate ba libertasaun nasionál. Organiza-an hodi hadi’a no tau matan nafatin ba fatin lulik ida ne’e, tanba ida ne’e la’ós responsabilidade estadu nian deit, maibé ita hotu nia dever no responsabilidade.

Entertantu, reprezentante família, Leandro Vei hateten, ohin hamutuk iha Munisípiu Liquiça atu valoriza no dignifika funu nain mártires pátria ne’ebé mate ba libertasaun nasionál rai ida ne’e nian, asuwain hirak ne’e merese hetan fatin ne’ebé dignu.

 “Ami família sente onradu no orgullu ba seremónia fúnebre ida ne’e, tanba Estadu tau ona sira iha fatin ne’ebé a’as no dignu. Hanesan família ami triste,  tanba sira mate, maibé ami orgullu no onradu kuandu sira mate hanesan heroi ba nasaun Timor-Leste, sira nia mate mak ita nia independensia,” tenik Leandro.

Partisipa iha seremónia hakoi restus mortais refere mak hanesan, Membrus Governu, Membrus Parlamentu, PNTL no FFDTL, Veteranus, inklui Família Saudosus nomós komunidades.