MSS REALIZA ENKONTRU MULTI-SEKTORÁL IHA NIVEL NASIONÁL BA DEZASTRES NATURAIS

Atu halo atendimentu ba vítimas dezastres naturais iha Timor-Leste ho di’ak, Governu liu hosi Ministériu Solidariedade Sosiál (MSS) konvoka enkontru no halo simulasaun ida kona-ba exersísiu multi-sektorál hodi hatan no fó resposta emerjénsia ba vítimas dezastres naturais. Atividade ne’e hala’o durante loron rua, iha edifisiu sentrál MSS, Kaikoli-Dili hahu iha loron 13-14 fulan Maio, tinan 2013 no kontinua hala’o exersísiu dezastres nian iha Tasitolu.

Relasiona ho programa ne’e, Vise-Primeiru Ministru, Fernando “Lasama” de Araújo hateten, dezastres naturais la’ós problema ba Ministériu ida deit maka atu fó atendimentu, maibé Ministériu hotu-hotu tenke partisipa, ne’e hanesan forma ida atu organiza rekursus humanus no fasilidade Estadu nian para hodi infrenta problema dezastres naturais ne’ebé mosu.

“Ita iha rekurus humanus no fasilidades ne’ebé limitadu, tanba ne’e enkontru ida ne’e importante tebes atu treina ita no ko’alia ba malu katak ita nia preparasaun atu hasoru dezastres naturais ne’e oinsá. Iha dia 14 sei kontinua iha Tasitolu hodi bele prátika, karik be’e sa’e oinsá ita bele halo evakuasaun ba vítima sira,” dehan Lasama.

MSS HALA’O WORKSHOP KONA-BA PLANU NO ESTRATEGIA HODI IMPLEMENTA POLÍTICA NASIONÁL BA EMA HO DEFISIÉNSIA

Ministériu Solidariedade Sosiál (MSS) realiza enkontru konjuntu ida hodi halo koordenasaun inter-ministerial no parseirus hotu, atu tau hamutuk hanoin hodi implementa planu no estratéjia polítika Nasionál ba ema difisiénsia iha Timor-Leste.  Enkontru refere hala’o iha Salaun Edifísiu Sentral MSS, Kaikoli-Dili, iha Loron Sesta-Feira, (10/05/2013).

Iha okaziaun ne’e, Vise-Ministru MSS, Jacinto Rigoberto Gomes de Deus hateten, enkontru inter-ministeriál hamutuk ho parseirus no mós instituisoens sira ne’ebé mak servisu iha área difisientes ho objetivu atu trasa planu no estratejia hodi implementa polítika nasionál ba difisientes ne’ebé mak aprova tiha ona iha tinan kotuk.

Depois workshop ida ne’e kada liña Ministerial ida-idak bele hatama iha planu asaun anuál nomós atu prevé orsamentu iha sira nia orsamentu jerál estadu, ne’ebé iha juñu 2014 tenke submete hodi nune’e bele garante atendimentu ne’ebé mak di’ak tuir padraun internasionál no mós iha planu atu ratifika Konvensaun Direitus ba ema difisientes hodi nune’e iha implementasaun bele lao ho di’ak.

MSS asina MoU ho Parseirus 29
Atu implementa polítika no programas V Governu Konstitusional nian ho di’ak, Governu liu hosi Ministériu Solidariedade Sosiál (MSS) asina akordu ho Parseirus no Instituisoins Nasional hamutuk 29 ne’ebé servisu iha áreas sociais, iha Bemori, Loron Sesta-Feira, 19/04/2013.

Hafoin asina MoU ida ne’e, Vise-Ministru MSS, Jacinto Rigoberto Gomes de Deus hateten, ohin Ministériu Solidariedade Sosiál halo akordu ho Instituisoens sira ne’ebé durante ne’e servisu hamutuk ho MSS, iha área tolu (3) mak hanesan área Defisiente, Protesaun Labarik, violénsia doméstika nomos violénsia bazeia ba jéneru.

Instituisaun hamutuk 29 mak asina akordu ne’e, inklui Instituisoens hitu (7) ne’ebe desde inisiu hetan apoiu hosi Kooperasaun Portuguesa liu hosi servisu hamutuk ho MSS, maibé hahú tinan ida ne’e MSS mak responsabiliza no mós aloka osamentu ba sira, ho montante USD 70.000. Total orsamentu nebe aloka ba Instituisoens hotu iha tinan ida nee hamutuk USD 1.189.027.00