MINISTÉRIU SOLIDARIEDADE SOSIAL ANÚNSIA TAKA LISTA EDITAIS SUBSÍDIU BA FERIK-KATUAS NO INVÁLIDUS

Ministériu Solidariedade Sosial liu husi Sekretáriu Estadu Seguransa Sosiál (SESS), Sr. Vitor da Costa hala’o konferénsia imprénsa iha Edifisiu Ministériu da Solidariedade Sosiál (MSS) Caicoli-Dili, ho nia objetivu atu fo hatene ba públiku konaba taka lista editais subsídiu ba Ferik-Katuas no Inválidus sira, iha loron Kuarta (4/4/2012).

Victor da Costa hateten katak lista editais ne’ebé atu taka, hahú hosi fulan Abril tinan 2012, no lista ne’ebé sei fó sai la’ós lista finál ba pagamentu nian, maibé atu fó informasaun katak, karik iha dadus ruma mak laloos hosi lista hirak ne’e, nune’e benefisiárius sira bele halo reklamasaun tuir Dekretu Lei ne’ebé iha.

SESS liu hosi Diresaun Nasionál Seguransa Sosial, apela ba Idozus no inválidus sira ne’ebé mak atu halo reklamasaun ruma, sei fó tempu durante loron tolunulu (30) nia laran, sura hosi lista ne’ebé fó sai, tuir Dekretu Lei 18/2008 artigu 27. Bazeia ba prosedimentu legál ida ne’e, DNSS sei la simu reklamasaun iha tempu pagamentu. No, ba kandidatus ne’ebé mak hatama reklamasaun tuir duni durasaun tempu ne’ebé determina, maka Diresaun sei halo prosesu iha faze tuir mai ka segunda faze.

Lista no dadus editais hosi Distritu 13 ho total hamutuk 92,122 benefisiárius, fahe ba kategoria hanesan tuir mai ne’e, Lista Dadus Ativu ema na’in 83.816, Lista In-Ativu iha ema na’in 5.644, Lista Dadus Pendenti ema na’in 145, Lista Dadus Veteranus iha na’in 389 no Lista ba sira ne’ebé Mate ona ema na’in 2.128 esplika SESS.